EXECUTIVE CHAIRMAN
Mizoram UPC Executive Chairman Upa F. Lalremmawia chuan, May ni 12 Pathianni hmang khan Serchhip Bial a tlawh.
May ni 9, Zirtawpni zanah Hebron Tualchhung PYD te nen Pathian thu an zirhova, zawhna leh sawihona hunte hman niin, PYD member kalkhawm ten hlawkthlak an ti hle a ni.
May ni 12 Pathianni chawhnu khan Serchhip Bial inkhawmpuiin a lo rel tawh bawhzui nan, Bial chhunga Upa zawng zawng te chu Executive Chairman hian Seminar leh Leadership training thupui chi hrang hrang hmangin a neih pui bawk a, Pathian biak inkhawmah thuhril rawngbawlna a nei ṭhin bawk a ni.
GENERAL TREASURER
General Treasurer Rev. Rokhuma leh General SS Department Chairman Upa Lalnuntluanga Sailo-te chu May ni 17 Inrinni hian Tripura District Children’s Meet hmanpui turin an zin chhuak a, General SS Dept. Treasurer C. Lalbiakhluni’n a tawiawm. General Headquarters hruaitu zin chhuakte hi May ni 19 Thawhtanni hian Aizawl an lo let leh ang.
General Missions Dept.
General Missions Department Executive Board chu May ni 15 Ningnai khan Mizoram UPC Committee Room General Headquarters Office-ah an thu khawm a, kum 2025 General Missions Dept. inkhawmpui chu Zemabawk Bialah an nghat.
He thutkhawm hi Board Chairman Upa Lalthlamuana Hnamte in a kaihruai a, October ni 24-26 chhunga General Missions Dept. inkhawmpui a hun neitu tur hetiang hian an ruat. Zirtawp zanah Pastor Lalhmangaihzuala, Guwahati Field, Inrinni zanah Pastor Orabindo Musahary Uttar Pradesh Field, Pathianni chawhmaah Upa Lalthlamuana Hnamte, Chairman General Missions Dept., Pathianni chawhnuah Pastor Nelson Laltanpuia Vaiphei, Agra Field leh Pathianni zanah Mizoram UPC Puipa atangin thu sawi ngaihthlak a ni dawn a ni.
General Missions Dept. Executive Board chuan thawktu mi palite service rules ennawnin, an kaisan theihna tur Departmental Exam a buatsaih sak bawk a, an vai hian kai san tir an ni.
Heng bakah hian Kolkatta hmuna Sankar Abasan, Hatiara Road, Hela Batalla-a kohhran Building chu Executive Board chuan a hawnna inkhawm buatsaih an rel a, hun remchang hmasaberah Mizoram UPC General Superintendent-in Pathian hnena hlanna leh hawnna a nei dawn a ni.
Gen LAD
Mizoram UPC Tanpuitu Hmeichhe Pawl Executive Board chu May Ni 9 Zirtawpni khan Upa K.Lalthantluanga In, Zonuamah an thu khawm a, kum 2026 General LAD inkhawmpui, Lunglei South Bial-ah an nghat.
General LAD Executive Board thutkhawm hi President C. Renghlupui’n a kaihruai a,
Kum 2026 General LAD Inkhawmpui, Lunglei South bial-in thlen an dil angin, inkhawmpui hi Lunglei South Bialah nghah an remti a, General Board-ah chhawp chhuah leh tur a ni.
Kumin General LAD Board Otober ni 18&19 chhunga an neih tur pawh, thlen dilna hmun li atanga lo lut awm zingah, kum 2025 General LAD Board chu Lengte kohhranah an nghat bawk a ni.
Heng bakah hian Seminar cum revival hmanpui tura sawmna Bial hrang hrang atanga an dawn chu tihhlawhtlin an rel bawk a, bial an tlawh turte chu thupui 4, Incheina, Leadership, I puan in hmun chu zauh rawh tih leh Rinawmna tih thupui hmangte a seminar neih pui thin turin an rel bawk a ni.
General LAD Executive Board chuan Budget hrang hrang pek tur an neihte chu hetiang hian a rang lama pek an remti a, Bethani Children’s Home Society Board hnenah Budget Head atangin 50%,
Chaw ei ai (Bethani Pual) Head atangin Budget pek tlak vek, ZMC (Poor Fund) a luanchhuahna atan Rs. 50,000/- (Singnga) pek, Pentecost Meichher enkawlna atan Rs.77,000/- pekte, Crusade & Evangelism (Project 2025) pual atan Bial tin a thawhlawm lo lut apiang General Treasurer hnena chhun luhte leh Missionary puala luanchhuahna atan Rs.70,000/- pek chhuahte an rel a ni.
General LAD Executive Board thutkhawm hi Rev. T. Laldingliana General Secretary Mizoram UPC chuan a ho a ni.
SUNNA
Rev. Vanlalfela Sailo (Retd) chu May ni 13 Thawhlehni Dar 3:25 AM khan Ebenezer Hospital- ah a boral a. Chhun dar 1:00 ah a chenna In Chawlhhmunah, Bialtu Rev.R.Laldawngliana'n a vui liam.
BP sang leh zunthlumin hun engemaw chen a tihbuai hnuah Kum 2024 August thla khan Semi Stroke a nei a ni tih hriat chhuah a ni a. In sawiselna a neih chho tak reng avangin Kumin March thla khan Ebenezar Hospital-ah Admit niin, ICU ah hial dah luh a ngai chho ta a, Doctor, Nurse leh chhungkua laina ten theihtawp chhuahin an enkawl, that lam a pan ni a an hriat laiin, rawng a bawl sak thin Lalpa hnenah minlo chawlhsan ta a ni.
Rev. Vanlalfela Sailo hi Mizoram UPC kohhran Arsi lian ti a chhalte zing a mi ani a,
kum 1987 khan Mizoram Police hna a chelh lai chu bansanin Full Trem-a Pastor hna thawk turin a in pe a, kum 25 chhung Pastor hna chelh hmanin Kum 2012 July thla khan a Pension a ni.
Pastor hna a thawh chhung hian Bial 7 a vawng hman a, heng bakah hian chanvo pawimawh tak tak, General Superintendent, General Secretary, General SS Secretary (Term 2) North Mizoram District Superintendent, Hmarthlang District Superintendent leh ATI Board Chairman nihna te a lo chelh tawh bawk a ni.
Pastor hna a Pension hnu hian Kohhran a rawngbawlna chu a chhunzawm zela. Khawtlangah pawh a phak tawkah thahnem ngai taka ke penin, Branch YMA Adviser, MUP hruaitu hna te a chelh thin bawk a. A thih ni thleng hian an chenna veng Bethel Welfare ah hian Chairman hna a chelh bawk a ni.
